Vistvænar og gleðilegar jólasveinahugmyndir

Jólasveinarnir mæla með að gefa skynsamlegar gjafir í skóinn. 
Jólasveinarnir og Borgarbókasafnið eru í skemmtilegu samstarfi þessi jól. Þeir hafa nefnilega áhuga á að vera umhverfisvænni en venjulega og vilja deila því með öllum sem langar að gera jólin betri fyrir umhverfið, veskið og samviskuna. Jólasveinarnir koma með tillögur að gjöfum í skóinn á hverjum degi sem settar verða á Instagram  bókasafnsins og hér að neðan eru enn fleiri hugmyndir fyrir jólasveinana. Nú er bara að bretta upp ermarnar og aðstoða þá í markmiðum sínum að gera jólin enn grænni en venjulega.

  • Föt, dót og bækur á nytjamörkuðum, svo sem Barnaloppunni, Rauðakrossinum, Kolaportinu, Bland.is og fleiri stöðum.
  • Góðgæti - Mandarínur ... og sælgæti á þeim dögum þar sem það má.
  • Piparkökumót og krukka með innihaldi - Setja innihaldsefni í piparkökur í krukku og barnið fær að baka.
  • Notuð leikföng - Skiptast á smádóti við nágrannajólasveina.
  • Bókasafnskort  - Pssst, þau eru ókeypis fyrir börn 17 ára og yngri!
  • Eplabátar í bréfpoka til þess að fara og gefa kanínunum í Öskjuhlíð.
  • Kerti og spil ásamt fallega skrifaðum leiðbeiningum að nýjum spilakapli til að læra.
  • Saga frá jólasveininum um ævintýri sem hann hefur lent í.
  • Sokkabuxur, skyrtu, hárskraut og annað sem verður notað á jólunum.
  • Trölladeig - Setja innihaldsefni í krukkur og barnið fær að föndra. 
  • Goggur með uppbyggilegum og skemmtilegum setningum, s.s. þú ert klár, þú ert skemmtileg/ur o.s.frv.

Einnig er góð hugmynd að gefa samverustund í skóinn. Borgin okkar góða býður upp á ýmislegt skemmtilegt fyrir fjölskyldur og börn, stór sem smá. Hér að neðan sjáið þið helling að hugmyndum en jólasveinar mega endilega sækja skjalið og handskrifa inn á þá samverustund sem verður fyrir valinu.

samveruskirteini_jpeg.jpg

Sækja Samverugjafakort sem PDF

  • Miðbæjarferð í Strætó og skoða jólaköttinn og jólavættina.
  • Skautaferð.
  • Kvöldganga í myrkrinu með vasaljós.
  • Jólasögustund (með jólabók fengna að láni í bókasafninu).
  • Bókasafnsferð til að fá lánaðar bækur og pakka jólagjöfunum í bókasafninu.
  • Jólaföndur.
  • Baka pizzu saman eða uppáhaldsmat barnsins.
  • Gera púðavirki í stofunni með teppum.
  • Búa til leir og slím
  • Setja saman piparkökuhús með fjölskyldunni.
  • Stúdíótímar í Kompunni - Hefur barnið samið sögu eða ljóð? Gefðu því tíma í hljóðverinu í Borgarbókasafninu Grófinni svo það geti lesið söguna sína inn á hljóðupptöku - Pssst, Kompan er ókeypis fyrir alla sem eiga kort!